කොරෝනා ආසාදනය වීමෙන් ගාල්ල, කරාපිටිය රෝහලේ ප්‍රතිකාර ලබමින් සිටි වෛද්‍ය ගයාන් දන්තනාරායන මහතා ජීවිතක්ෂයට පත් වීමත් සමග සෞඛ්‍ය වෘත්තිකයින් තිගැස්මකට පත්ව ඇති බව රජයේ වෛද්‍ය නිලධාරීන්ගේ සංගමය පවසයි.
කොළඹ ඊයේ (02) පැවති මාධ්‍ය හමුවකට එක්වෙමින් රජයේ වෛද්‍ය නිලධාරීන්ගේ සංගමයේ සංස්කාරක වෛද්‍ය හරිත අලුත්ගේ මහතා පැවසුවේ, දෙවන කොරෝනා රැල්ල තුළ වෛද්‍යවරුන් 100 දෙනෙකුට පමණ කොරෝනාවෛරසය ආසාදනය වී ඇති බවය.
මේ අතර, සෞඛ්‍ය කාර්ය මණ්ඩලයේ 1000ක් පමණ මේ වන විට කොරෝනාවෛරසයට ගොදුරු වී ඇති බවත් ඔවුන්ගේ ආශ්‍රීතයින් සංඛ්‍යාව ද සැලකිය යුතු මට්ටමකින් ඉහළ ගොස් ඇති බවත් වෛද්‍ය හරිත අලුත්ගේ මහතා සඳහන් කළේය.
සෞඛ්‍ය වෘත්තිකයින් කොරෝනාවෛරසයට ගොදුරුවීම තුළ මෙරට සෞඛ්‍ය පද්ධතිය විශාල කඩා වැටීමකට ලක්විය හැකි බව ද හරිත අලුත්ගේ මහතා පැවසීය.
සෞඛ්‍ය වෘත්තිකයින්ට විස්වාසයෙන් යුතුව රාජකාරී කළ හැකි පරිසරයක් නිර්මාණය කිරීම සෞඛ්‍ය බලධාරීන් සතු වගකීමක් බව ද ඔහු සඳහන් කළේය.
මෙහිදී වැඩිදුරටත් අදහස් දැක්වූ රජයේ වෛද්‍ය නිලධාරීන්ගේ සංගමයේ සංස්කාරක වෛද්‍ය හරිත අලුත්ගේ මහතා මෙසේ ද පැවසීය.
”අපි ඇත්ත කතා කරනකොට, ජනතාව බිය කරන බිල්ලො මවනවා කියන චෝදනාව අපට තියෙනවා. අපි ඒ චෝදනාවට බයේ ඉන්නේ නෑ. යථාර්ථය රටට හෙළි කරනවා. ගායන්ගේ වගේ මරණ ඉදිරියට නොවෙන්න කටයුතු කරනවා.”
කොරෝනා රෝගයට ගොදුරු වූ තරුණ වෛද්‍යවරයකු ගාල්ල කරාපිටිය රෝහලේ දැඩිසත්කාර ඒකකයේ
ප්‍රතිකාර ලබන බව පසුගිය දිනවල වාර්තාවී තිබුණි.
රාගම මහ රෝහලේ සේවය කළ මේ තරුණ වෛද්‍යවරයා වෛද්‍ය ගයාන් දන්තනාරායන වන අතර ඔහු අද (02) උදෑසන මියගිය බව කරාපිටිය රෝහල් ආරංචි මාර්ග පවසයි.
කොරෝනා වැලඳීම නිසා ඔහුව මීට දින කිහිපයකට පෙර ප්‍රතිකාර ගැනීම සඳහා ඇතුළත් කර තිබුණේ මුල්ලේරියාව රෝහලටය.
අනතුරුව ඇතිවූ සංකූලතා හේතුවෙන් අසාධ්‍ය තත්ත්වයට
පත්වූ මෙම වෛද්‍යවරයාව ගාල්ල කරාපිටිය රෝහලට රැගෙන ගොස් එක්මෝ (ECMO) යන්ත්‍රයට සම්බන්ධ කර ඇත්තේ කොරෝනා රෝගය හේතුවෙන් හෘදය හා පෙණහලු අකර්මණ්‍ය වීමෙන් වලක්වා ගැනීම සඳහාය.
දැනට ශ්‍රී ලංකාවේ කිසිදු රෝහලක නැති මේ ‘එක්මෝ’ යන්ත්‍රය ඇති එකම රෝහල වන්නේද ගාල්ල කරාපිටිය රෝහල වූ අතර එම යන්ත්‍රය මගින්
වෛද්‍යවරයාගේ අක්‍රිය වන පෙණහලු හා හෘදයට උත්තේජනයන් ලබා දීම සිදු කරන ලදි.
කෙසේ වෙතත් පෙනහළු ක්‍රියාකාරීත්වය අඩපණ වී කරාපිටිය ශික්ෂණ රෝහලේ දැඩි සත්කාර ඒකකයේ ප්‍රතිකාර ලබමින් සිටි ඔහුගේ ජීවිතය බේරාගැනීමට වෛද්‍යවරුන් අසමත්වූ බව අද වාර්තා කෙරිණි.
නුගේගොඩ ලයිසියම් ජාත්‍යන්තර පාසලේ අධ්‍යාපනය ලබා චීනයේ ටියැන්ජින් වෛද්‍ය විද්‍යාලයෙන් වෛද්‍ය උපාධිය ලැබූ ගයාන් දන්තනාරායන රෝගාතුරවන විට රාගම ශික්ෂණ රෝහලේ සේවය කළේය.
මෙම වෛද්‍යවරයාගේ පවුලේ සාමාජික සාමාජිකාවන් කිහිප දෙනෙක් ද මේ වනවිට කොරෝනා ආසාදනය වී ප්‍රතිකර ලබමින් සිටිති. මෙම වෛද්‍යවරයා ගම්පහ ප්‍රදේශයේ පදිංචිව සිටියේය. ඔහුගේ පියා ද වෛද්‍යවරයෙකි.
කොරෝනා ආසාදනය වීම හේතුවෙන් ශ්‍රී ලංකාවේ දී වෛද්‍යවරයෙකු මියගිය ප්‍රථම අවස්ථාව මෙයයි.
ළමා අපයෝජන, බලාපචාර හා ළමා වැරදිකරුවන් සම්බන්ධයෙන් යෝජනා ලබාදීමට කමිටු 05ක්