Editor
කොවිඩ් 19 - පාසල් ක්‍රීඩා සහ ක්‍රීඩා වැඩසටහන් පැවැත්වීමට අදාළව විශේෂ උපදෙස්
අධ්‍යාපන අමාත්‍යාංශයත්, සෞඛ්‍ය අමාත්‍යාංශයත් ක්‍රීඩා අමාත්‍යාංශයත් එක්ව ගනු ලැබූ තීරණයක් අනුව, කොව්ඩ් 19 වෛරසයේ ව්‍යාප්තිය පාලනය කිරීමේ අරමුණු පෙරදැරිව පාසල් ක්‍රිඩා හා ක්‍රීඩා වැඩසටහන් පැවැත්වීමට අදාළ ව විශේෂ උපදෙස් මාලාවක් හඳුන්වා දී ඇතැයි අධ්‍යාපන අමාත්‍යාංශය සඳහන් කරයි.
ශ්‍රීමත් අනගාරික ධර්මපාලතුමන්ගේ 156 වන ජන්මදිනය අදයි
ශ්‍රීමත් අනගාරික ධර්මපාලතුමන්ගේ 156 වන ජන්මදිනය සිහිකරනු වස් ජනපති ගෝඨාභය රාජපක්ෂ මහතාගේ ප්‍රධානත්වයෙන් පැවැත්වෙන ජන්ම සමරු උත්සවය අද දින (17) පෙරවරු 10 ට කොළඹ 10, මරදාන, විපුලසේන මාවතෙහි අංක 58 දරනමහාබෝධි අග්‍ර ශ්‍රාවක මහා විහාරයේදී පැවැත්වීමට කටයුතු සංවිධානය කර ඇත.
MT New Diamond නෞකාවේ ගින්න පාලනය වෙනුවෙන් නීතිපති රුපියල් මිලියන 340ක් ඉල්ලයි
MT New Diamond නෞකාවේ ගින්න පාලනය හා ඒ ආශ්‍රිත සිදුවීම් වෙනුවෙන් රුපියල් මිලියන 340 ක මුදලක් ලක් රජයට ගෙවන ලෙස නීතිපති එම සමාගමේ නීති අංශයට දන්වයි.
සරුසාර අස්වැන්නකට දේශීය විසඳුම්
සමතුලිතාව සහ සහජීවනය සොබා දහමේ ඇති අපූරු සංසිද්ධියකි. ගොවිතැන යනු මෙම පාරිසරික නියතීන් අපූරුවට ගළපා ගනිමින් සිදු කළ යුතු කර්මාන්තයකි. ගොවිතැන් කටයුතුවලදී ගොවින් මුහුණ දෙන විවිධ පළිබෝධ හානි ජය ගැනීමට සොබා දහමෙන්ම ලබා දී තිබෙන අසිරිමත් ප්‍රතිකාර සොබාදහමේ තුලිතතාව පෙන්වන හොඳම සාධකයි. ගොවිතැන ජය ගැනීමට රසායනික තෙල් පොහොරම වුවමනා යැයි පවතින මතය පුස්සක් බවට පත් කරන මේ ප්‍රතිකාරවල ශක්තිය බොහෝ දෙනෙක් නොදනිති. කෘමිනාශක වෙනුවට සොබා දමේ අපූරු නිපැයුම් වන ගහකොළ පැළෑටිවල පස් පංගුවෙන් සකසා ගන්නා ප්‍රතිකාරවලින් මෙම පළිබෝධ හානි මැඬීමට ඇති හැකියාව ඔබටත් අත්හදා බැලිය හැකියි.
පළිබෝධ හානි මැඬලීම සඳහා ශාක සාරයෙන් සකසා ගත හැකි පළිබෝධ නාශක පරිසරයට හිතකර මෙන්ම ගොවියාට මුදල් ද ඉතිරි කර ගත හැකිය. එමෙන්ම අස්වැන්න ආහාරයට ගැනීමෙන් නිදන්ගත රෝගා බාධ ව්‍යාප්තිය අවම කිරිමට සාර්ථක පිළියමක් ද වෙයි. සෞභාග්‍යයේ දැක්ම රජයේ ජාතික වැඩසටහනට සමගාමීව විද්‍යා හා තාක්ෂණ අමාත්‍යාංශය මඟින් ක්‍රියාත්මක කර ඇති ගොවි ප්‍රජාව කාබනික කෘෂිකර්මාන්තයට නැඹුරු කිරිමේ එක් උත්සාහයක ප්‍රතිඵලයක් ලෙස ඇහැටුවැව විදාතා සම්පත් මධ්‍යස්ථානයේ විද්‍යා හා තාක්ෂණ නිලධාරි හේමන්ත වන්නිනායක මහතාගේ සංවිධානයෙන් ආණමඩුව කොටවෙහෙර විදාතා සම්පත් නිලධාරි එන්.පී.පී සුනෙත් මහතාගේ සම්පත් දායකත්වයෙන් පැවති වැඩමුළුවකින් ගොවි ප්‍රජවට දුන් මේ දැනුම ඔබටත් ඔබේ ගෙවත්තට වගා බිමට රැගෙන යන්න පුළුවන්.
පණු හානියට
කොහොඹ කොළ හා කරඳ කොළ අමු ගොම දියර සමඟ මිශ්‍ර කර දින 14ක් පල් කර තබා ඉසින්න.
කෘමි හානියට
• සුදු ලූනු ග්රෑම් 100ක් සහ සබන් ග්රෑම් 10ක් සිහින්ව අඹරා ජලය ලීටර් ½ක ට මිශ්‍ර කර පැය 24ක් තබා එම මිශ්‍රණයට ජලය ලීටර් ½ක් නැවත එකතු කර වගාවට ඉසීම යෝග්‍යයයි.
• සුදු ලූනු ග්රෑම් 50ක් සිහින්ව අඹරා වතුර ලීටර් 1කට මිශ්‍ර කර ඉසින්න
කුඩිත්තන්ට සහ කොළ හකුළන දළඹුවන්ට
සුදු ලූනු ග්රෑම් 100ක් අඹරා භූමිතෙල් තේ හැදි දෙකකට කලවම් කර ජලය ලීටර් 1ක් හා සබන් ග්රෑම් 50කට මිශ්‍ර කර පැය 24ක් තබා පෙරන්න. ඉන් පසු හතර ගුණයක් තනුක කර ඕනෑම වගාවකට ඉසිය හැකිය.
කූඹීන්, වේයන් සහ නයි කූඹීන්ට
අනෝදා ඇට පතක් කොටා අඹරා ජලය ලීටර් 1කට දිය කර පෙරා ගත් දියරය ඉසින්න.
කුඩිත්තන්, පැළ කීඩෑවන්, සුදු මැස්සන්ට
වතුර ලීටර් 2කට අනෝදා කොළ ග්රෑම් 500ක් එක් කර ළිපක තබා රත් කරන්න. ඉන් පසු ජලය ලිටර් ½ක් දක්වා හිඳෙන්න හරින්න. පසුව පෙරා එයට ජලය ලීටර් 2ක් දමා මිශ්‍ර කර වගාවට ඉසින්න.
ඉල් මැස්සන්, කොළ කන දළඹුවන් සහ ගෙඩි විඳින පණුවන්ට -
තෝර මුල් ග්රෑම් 50ක් ගෙන සබන් ග්රෑම් 10ක් සමඟ කොටා ගෙන එයට ජලය ලීටර් 1ක් දමා හොඳින් දිය කර ගන්න. ඉන් පසු හානි කර ඇති පත්‍රවල උඩ සහ යටට හොඳින් ඉසින්න.
ඉල් මැස්සාට තවත් ප්‍රතිකාරයක්
• කලවැල් යුෂ ඉතා ස්වල්ප ප්‍රමාණයක් පැණි හෝ සීනි ද්‍රාවණයකට මිශ්‍ර කර එයින් රෙදි කැබලි පොඟවා පන්දලමේ තැනින් තැන එල්ලන්න.
• අමු ඉඟුරු සහ සුදු ලූනු කොටා එම යුෂ මේස හැඳි 5කට ජලය ලීටර් 1ක් මිශ්‍ර කර ඉසින්න.
සොලනේසි කුලයේ කොළ හැකිළෙන රෝගයට
ගඳපාන, ගන්සූරියා සහ ඇල්බීසියා කිලෝග්රෑම් 1 බැගින් ගෙන අමු ගොම කිලෝගරෑම් 1කට මිශ්‍ර කර ගෝණියකට දමා කට ගැට ගසා එම ගෝණිය ලොකු බැරලයකට දමා ඒ මත ලොකු ගලක් තබා ජලය ලීටර් 20ක් දමා දින 21ක ට පසු එම දියරයෙන් ලීටර් 1කට ජලය ලීටර් 3ක් මිශ්‍ර කර ඉසින්න.
මයිටාවන්ට සහ පැළ මැක්කන්ට
මැටි භාජනයකට ජලය ලීටර් 1ක් දමා හොඳින් උණු කර ගන්න. එයට පොඩි කර ගත් රතු ලූනු කිලෝග්රූම් 1ක් දමා රෙදි කඩකින් කට ගැට ගසා පැය 24ක් තබා පෙරා ගන්න. පෙරා ගත් දියරයට ජලය ලීටර් 10කට මිශ්‍ර කර ඉසින්න.
අඹන්පොළ විශේෂ - සකුන්තලා ජයසිංහ
අන්තර්ජාතික ඕසෝන් දිනය අදයි - "සුවපත් කිරීමේ වසර 32 ක්" මෙවර තේමාවයි
අන්තර්ජාතික ඕසෝන් දිනය අදට යෙදී තිබේ.
'ජීවය සඳහා ඕසෝන්' මෙවර අන්තර්ජාතික ඕසෝන් දින සැමරු‍ෙමහි තේමා පාඨයයි.
ඉකුත් 2019 ජුනි මාසයේදී අධික උෂ්ණත්වය දරාගැනීමට අසීරු වීම හේතුවෙන් ප්‍රංශයේ පාසල් 4000 ක් තාවකාලිකව වසා දැමීමට සිදුවිය.
දෙමසක් තුළ රුසියාවේ ඇති වූ ලැව්ගිනි හේතුවෙන් අක්කර මිලියන 17 ක් විනාශ වූ අතර ඇලස්කාවේ අක්කර මිලියන 2.4 ක් ගින්නෙන් දැවිණි. පසුගිය දිනවල ඇමසන් වනයේ ඇතිවූ දහස් සංඛ්‍යාත ලැව්ගිනිවලට හේතුව ද දේශගුණික විපර්යාසයන්ය.
‘ජාත්‍යන්තර ඕසෝන් දිනය‘ සැප්තැම්බර් 16 වැනිදාට යෙදිණි, මෙවර තේමාව වූයේ ‘සුවපත් කිරීමේ වසර 32 ක්‘ යන්නය.
‘මොන්ට්‍රියල් ප්‍රඥප්තිය‘ යටතේ ඕසෝන් වියන සුරැකීමට මෙන්ම දේශගුණික විපර්යාස වළක්වා ගැනීමට දරන ලද ප්‍රයත්නය ඉන් අරුත්ගැන්වේ. එමෙන්ම නිරෝගී මිනිසුන් සහ නීරෝගී මිහිතලයක් පිළිබඳ අවශ්‍යතාව ලෝකයට සිහිපත් කිරීම ද ඉන් අරමුණු කෙරේ. මෙවර ඕසෝන් දිනය සැමරුවේ ‘දේශගුණික විපර්යාස‘ යනු හුදු මාතෘකාවක් නොව එහි ඵල විපාක ලෝකය අත්විඳිමින් සිටියදීය. ගෝලීය උණුසුමෙන් ඔබ්බට ගොස් මිහිතලය දැවෙමින් තිබීම ගැන කතා කරන්නට අද ලෝකයට සිදුව තිබේ.
දැවෙන මිහිතලය සිසිල් කරන්නේ කෙසේද යන්න ලෝකය ඉදිරිපිට ඇති දැවැන්ත අභියෝගයකි. එය ජයගැනීමට දරන ප්‍රයත්නයේදී ඕසෝන් වියන රැකගැනීම ද ඉහළින් ම ඇත.
මොන්ට්‍රියල් ප්‍රඥප්තියට අත්සන් තැබීම සිදුවූයේ 1987 සැප්තැම්බර් 16 වැනිදාය. එවක් පටන් එක්සත් ජාතීන්ගේ 49/114 යෝජනා සම්මතය යටතේ සෑම වර්ෂයකම සැප්තැම්බර් 16 වැනිදා දිනය ‘ජාත්‍යන්තර ඕසෝන් දිනය‘ ලෙස නම් කර සැමරීම සිදුවේ.
සූර්යයාගෙන් නිකුත්වන අහිතකර පාරජම්බූල විකිරණ මිහිතලයට පතිතවීම වැළැක්වීම සිදුවන්නේ ඕසෝන් වායු ස්ථරය මඟිනි. කුඩයක් අව්-වැසිවලින් අපට ආරක්ෂාව සපයන්නා මෙන් එම ස්ථරය වියනක් ලෙස ක්‍රියාකර මිහිතලය රැක ගනී. එසේ වුවද නොයෙක් නිෂ්පාදන ද ඇතුළුව මිනිස් ක්‍රියාකාරකම් හේතු‍ෙවන් වායුගෝලයට නිදහස් වන ක්ලෝරොෆ්ලොරෝන්කාබන් (CFC) හා හයිඩ්‍රෝෆ්ලුමොකාබන් (HFC) එම වියනට හානිකළ අතර ඕසෝන් වියන සිදුරුවීම යන්නෙන් අදහස් වන්නේ එම විනාශයයි. එම සිදුර පුළුල්වීමට වළක්වා ගැනීමට ගත හැකි විවිධ පියවර හා ක්‍රියාමාර්ග ගතවූ වසර 32 තුළ ගැනිණ. එහිදී මොන්ට්‍රියල් ප්‍රඥප්තියේ පාර්ශ්වකාර රටවල් 2016 ඔක්තෝබර් 15 වැනිදා ඇතිකරගත් ‘කිගාලි සම්මුතිය‘ වඩාත් වැදගත් පියවරකි.
‘ඕසෝන් වියන‘ පිළිබඳ සොයාගැනීම කළේ ඔක්ස්ෆර්ඩ් සරසවියේ මහාචාර්යවරයකු වන ගෝර්ඩ්න් ඩොබිසන් ය. ඒ, වසර 1957 දීය. වායුගෝලයේදී විනයක් ලෙස රැඳෙමින් මිහිතලය රැකගැනීමට ක්‍රියාකළ ද බිම් මට්ටමේදී ඕසෝන් යනු ප්‍රබල මෙන්ම අනතුරුදායක වායු දූෂකයකි. මානව ක්‍රියාකාරකම් හේතුවෙන් ඕසෝන් වියනට තර්ජන ඇතිවීම අම්ල වැසි ඇතිවීම වැනි බියකරු ප්‍රතිවිපාකවලට හේතුවන බව විද්‍යාඥයෝ අනතුරු අඟවා සිටිති. ශාක ජීවන චක්‍රයට ඇතිවන බලපෑම් ඔස්සේ ආහාර දාමවලට ඇතිවන බලපෑම, සුළං රටා වෙනස්වීම, මිහිතලය උණුසුම් වීම වැනි දෑ ද එහි ප්‍රතිඵල අතර තිබේ.
ඕසෝන් වියනට හානිකරන ක්ලෝරො‍ෆ්ලොරෝන් කාබන් පරිසරයට මුදාහරින හෙයාර් ස්ප්‍රේ, ෆ්රෙෂනර්ස්, සුවඳ විලවුන්, ප්ලාස්ටික් ඇසුරුම් වැනි දෑ භාවිතය අවම කර ගැනීම මෙන්ම ගස් සිටුවීම හා වනාන්තර රැකගැනීම, ගෙවතු වගාවලදී හා වගාබිම්වලදී පරිසර හිතකාමී පොහොර එනම්, කාබනික පොහොර භාවිතය, වාහනවලින් දුම් පිටවීම අවමකර ගැනීම වැනි පියවර ඕසෝන් වියන රැකගැනීම වෙනුවෙන් අපට ගත හැකි පහසු මෙන්ම ඵලදායී ක්‍රියාමාර්ග වේ.
මොන්ට්‍රියල් ප්‍රඥප්තිය මඟින් CFC ඇතුළු ඕසෝන් වියනට අහිතකර වායු හා සංඝටක නිදහස් කරන එවැනි රසායන ද්‍රව්‍ය හා ශීතකරණ, වායුසමීකරණ ආදී උපකරණවල එම දූෂණය 99% කින් වළක්වා ගත යුතු බවට තහංචි පනවා තිබේ. ඉන් බැඳී සිටින රටවල් ඊට එකඟ වී සිටිති.
සාමාජික රටවල් 197 විසින්ම සම්මත කර අපරානුමැතිය ලද එක්සත් ජාතීන්ගේ එකම ප්‍රඥප්තිය ද මොන්ට්‍රියල් ප්‍රඥප්තියය. එය ක්‍රියාත්මක කිරීමේදී සංවර්ධිත හා සංවර්ධනය වෙමින් පවත්නා සෑම රටක්ම එකම මට්ටමින් සැලකෙන නමුදු ඒවාට පැවරෙන වගකීම් වෙනස් ය. කෙසේ වුවද, වඩාත්ම වැදගත් වන්නේ සෑම රටක්ම ඉන් බැඳී සිටින අතර නිශ්චිත කාල රාමුවක් තුළ සපුරාලිය යුතු ඉලක්ක ලබා දී තිබීමය. මෙයින් පැහැදිලි වන පරිදි මොන්ට්‍රියල් ප්‍රඥප්තිය යටතේ එළැඹි එකඟතා ප්‍රායෝගිකව සපුරාගැනීම වෙනුවෙන් සමස්ත ලෝකයටම වගකීම පැවරී තිබේ.
මෙවර ජාත්‍යන්තර ඕසෝන් දිනයේදී, එක්සත් ජාතීන්ගේ සංවිධානය ලෝකවාසී ජනතාවගෙන් ඉල්ලා සිටියේ, මොන්ට්‍රියල් ප්‍රඥප්තිය යටතට ඇතුළත්. 2019 ජනවාරි 1 වැනිදා සිට බලාත්මක වූ කිගාලි සම්මුතිය ක්‍රියාත්මක කිරීම වෙනුවෙන් හදවතින්ම සහාය දක්වන ලෙසය. එම ඉලක්ක සපුරා ගැනීමට හැකි වුවහොත් මේ සියවස අවසානය වන විට ගෝලීය උෂ්ණත්වය සෙල්සියස් අංශක 0.4 කින් අඩුකර ගැනීමට හැකිවනු ඇත. එමෙන්ම, ඕසෝන් වියනේ ආරක්ෂාව ද සැලසේ.
ගෝලීය උෂ්ණත්වය ඉහළ නැඟීමේ දරුණු ප්‍රතිවිපාකයක් වී ඇත්තේ ධ්‍රැව ප්‍රදේශවල හිම කඳු දියවීමට පටන්ගෙන තිබීමය. ඉකුත් ජූලි මාසයේදී පමණක් ග්‍රීන්ලන්තයේ ග්ලැෂියර ටොන් බිලියන 217 ක් එලෙස දියවී ඇති බවට විද්‍යාඥයන් ගණන් බලා තිබේ. වැඩිම අයිස් ප්‍රමාණයක් දියවී ඇත්තේ ජූලි 31 වැනිදාය. එය ටොන් බිලියන 11 කි. ද්‍රව බවට පත්වන අයිස්, සාගර ජල මට්ටම ඉහළ දැමීමට හේතුවන අතර අනාගතයේදී ඉන් ඇතිවිය හැකි ප්‍රතිවිපාක පිළිබඳ දැනටමත් අනතුරු අඟවා ඇත. මාලදිවයින වැනි දූපත් රාජ්‍ය ලෝක සිතියමෙන් මැකී යාම වළක්වා ගැනීමට සමස්ත ලෝක ප්‍රජාවටම බලවත් පරිශ්‍රමයක් දැරීමට සිදුවනු ඇත.
‘වොෂින්ටන් පෝස්ට්‘ වාර්තා කළ පරිදි පසුගිය ජූලි මස වාර්තා වූ මෙම ප්‍රබල ග්ලැෂියර් ඛාදන 2012 වර්ෂයෙන් පසු වාර්තා වූ එවැනි දරුණුම තත්ත්වයය. 2012 දී ග්‍රීන්ලන්තයේ මිදුණු අයිස්වලින් 97% ක් පමණ දියව ගිය බව නිරීක්ෂණය විය. 2019 වර්ෂයේදී මේ දක්වා 56% ක අයිස් ප්‍රමාණයක් දියවී ඇති බවට ගණන් බලා තිබේ. 2012 වසරට වඩා මේ වර්ෂයේ සාමාන්‍ය උෂ්ණත්වය ඉහළ නැඟීම සෙල්සියස් අංශක 15 - 20 අතර ප්‍රමාණයක ඇත. ඉකුත් ජූලි මාසයේදී පමණක් එලෙස දියවූ අයිස් ප්‍රමාණය මුහුදු මට්ටම අඟල් 0.02 කින් ඉහළ දැමීමට තරම් ප්‍රමාණවත් බවට ගණනය කර ඇත.
මෑත භාගයේ වරින්වර අමෙරිකාවේ වෙරළබඩ ප්‍රදේශ ද ඇතුළුව ලොව නොයෙක් තැන්වලින් වාර්තා වූ ගොඩබිම මුහුදු ජලයෙන් යටවීම මේ තත්ත්වය නිසා සිදුවූවකි. ඉකුත් ජුනි මාසය ලොව මෙතෙක් වාර්තා වූ වැඩිම උෂ්ණත්වයන් සහිත ජූනි මාසයයි. හිම කඳු දියවීමෙන් නොනැවතී ග්‍රීන්ලන්තයේ ඇතැම් ප්‍රදේශවලින් ගිනි ගැනීම් ගැන පවා වාර්තා විය. මෙවැනි වෙනස්කම් වසර 800,000 ක ඉතිහාසයේ නොසිදුවූ ඒවා බව නිරීක්ෂණය කර තිබේ. වරින්වර හටගන්නා දරුණු සුළි කුණාටුවලට ද මෙම දේශගුණික විපර්යාස බලපා ඇති බව පැහැදිලිය.
ඉකුත් ජූලි මාසයේ අයිස් දියවීම පිළිබඳ තතු එසේ වන විට එම ජූලි මාසය ඉතිහාසයට එක්වූයේ වැඩිම උණුසුමක් සහිත මාසය වශයෙනි. මෙතෙක් වැඩිම උණුසුම් මාසය ලෙස වාර්තා වී තිබුණේ 2016 ජූලි මාසයයි. ඊට වඩා සෙල්සියස් අංශක 0.04 කින් උෂ්ණත්වය වැඩිවීම නිසා ඉකුත් ජූලි මාසය එම වාර්තාව බිඳ දමා තිබේ.
විද්‍යාඥයන් පෙන්වා දෙන පරිදි උණුසුම වැඩිම දිනයක්, සතියක් හෝ මාසයක් යනු හදිසි සංසිද්ධියක් නොව කලක් තිස්සේ සිදු වූ ක්‍රියාදාමයක ප්‍රතිඵලයකි. මිහිතලය උණුසුම් වීමට වැඩි දායකත්වයක් ලැබී ඇත්තේ මානව ක්‍රියාකාරකම් විසිනි. එම ක්‍රියාකාරකම් වැළැක්වීමෙන් තොරව උණුසුම අවම කළ නොහැකිය.
ඉකුත් ජූලි මාසය අප්‍රිකා මහාද්වීපයට උණුසුම වැඩිම මාසය විය. ප්‍රංශය, බෙල්ජියම, ජර්මනිය, නෙදර්ලන්තය වැනි රටවල් සිය ඉතිහාසයේ උණුසුම්ම දවස් ගෙවා දැමුවේ ද ජූලි මාසයේදීය. එකී උෂ්ණත්වය වැඩිවීම හේතුවෙන් සාගරයේ උෂ්ණත්වය ද ඉහළ ගියේය. විසිවැනි සියවසේ එම සාමාන්‍ය අගයට වඩා සාගරය ෆැරන්හයිට් අංශක 1.5 කින් වැඩිවිණි.
ඉකුත් ජූලි මාසය එක දිගට වැඩි උෂ්ණත්ව අගයක් සලකුණු කළ 43 වැනි ජූලි මාසයයි. එමෙන්ම වැඩි උෂ්ණත්ව අගයක් දැක්වූ 415 වැනි මාසයයි. මෙය දේශගුණික විපර්යාසවල ප්‍රතිඵලයකි.
ඉකුත් ජුනි මාසයේදී අධික උෂ්ණත්වය දරාගැනීමට අසීරු වීම හේතුවෙන් ප්‍රංශයේ පාසල් 4000 ක් තාවකාලිකව වසා දැමීමට සිදුවිය. දෙමසක් තුළ රුසියාවේ ඇති වූ ලැව්ගිනි හේතුවෙන් අක්කර මිලියන 17 ක් විනාශ වූ අතර ඇලස්කාවේ අක්කර මිලියන 2.4 ක් ගින්නෙන් දැවිණි. පසුගිය දිනවල ඇමසන් වනයේ ඇතිවූ දහස් සංඛ්‍යාත ලැව්ගිනිවලට හේතුව ද දේශගුණික විපර්යාසයන්ය. දේශගුණික විපර්යාසයන් ඇතිවීමට හේතුව වනාන්තර විනාශය ද ඇතුළුව මිනිස් ක්‍රියාකාරකම් බව ඇමසන් ඛේදවාචකයෙන් ද සනාථ වේ.
දේශගුණික විපර්යාසයන්ට එරෙහිව ක්‍රියාකිරීම සඳහා වන ක්‍රියාකාරී සමුළුවට ලෝක ජාතීන් ඉදිරි සතියේදී එක්සත් ජාතීන්ගේ සංවිධානයේ මූලස්ථානයට රැස්වනු ඇත. මෙවර ඕසෝන් දිනය වෙනුවෙන් එ. ජා. මහලේකම් අන්තෝනියෝ ගුටරෙස් නිකුත් කළ පණිවුඩය මඟින් අවධාරණය කෙරුණේ මොන්ට්‍රියල් ප්‍රඥප්තිය යනු ගෝලීය අභියෝගයන් ජය ගැනීම සඳහා මනුෂ්‍ය වර්ගයාට ඇති හැකියාව දක්වන උත්තේජනාත්මක නිදසුනක් මෙන්ම වර්තමානයේ උද්ගතව ඇති දේශගුණික අර්බුද කළමනාකරණය පිළිබඳ ප්රධාන මෙවලමක් ද වන බවයි. නොපමාව ක්‍රියාත්මක වීමේ අවශ්‍යතාව එමඟින් මහලේකම්වරයා පෙන්වා දී තිබිණි.
රටවල් 81 ක් අපරානුමැතිය ලබා දී ඇති කිගාලි සම්මුතිය ක්‍රියාත්මක කිරීම පිළිබඳ ද ඉන් පෙන්වා දී ඇත. ධරණීය සංවර්ධන ඉලක්ක ළඟාකර ගැනීමට නම් ඕසෝන් වියනේ යහපැවැත්ම තහවුරු කිරීම මෙන්ම හිතකර දේශගුණික තත්ත්ව පවත්වාගත යුතුය. තවත් දින කිහිපයකින් පැවැත්වෙන දෙශගුණික සමුළුව මේ අවශ්‍යතා තේරුම් ගන්නා මෙන්ම ඉලක්ක සපුරාගැනීම වෙත යොමු වූ හමුවක් වනු ඇත යන්න මහලේකම්වරයාගේ අපේක්ෂාවයි. මේ අභියෝගය තනි රටකට ජයගත නොහැකිය. ඒ සඳහා මුළුමහත් මිනිස් සංහතිය එක්ව නැඟී සිටිය යුතුය.
දිණමිණ උපුටා ගැනීමකි- ධම්මික සෙනෙවිරත්න
ජපානයේ නව අගමැති ලෙස යොෂිහයිඩ් සුගා නිල වශයෙන් නම්කරයි
කාඩ්බෝඩ් කර්මාන්තශාලා සේවකයෙකු මෙන්ම ගොවියෙකුගේ පුත්රයෙකු වන යොෂිහයිඩ් සුගා මහතා ලෝකයේ තුන්වන විශාලම ආර්ථිකය හිමි රටේ නායකයා ලෙස තෝරාගෙන ඇත. .පසුගිය බදාදා (15-09-2020) එරට පාර්ලිමේන්තුවේ පවතී ජන්ද විමසීමෙන් පසුව සුගා මහතා ජපානයේ නව අග්‍රාමාත්‍යවරයා ලෙස තේරී පත්වී ඇත.71 හැවිරිදි ඔහු පාලක ලිබරල ඩිමොක්‍ටීස් පක්ෂයේ නායකයා ලෙස 70% ජන්ද ප්‍රතිශතයක් ලබා ගත අතර නිල වශයෙන් අග්‍රාමාත්‍යවරයා ලෙස තේරී පත්වීමට නම් රටේ ජාතික ව්‍යවස්ථාදායක සභාවේ සහය අවශ්‍යය. ඒ අනුව පවතී ජන්ද විමසීමේදී පහල මන්ත්‍රී මණ්ඩලයේ ජන්ද 465 න් 314ක් සහ ඉහල මන්ත්‍රී මණ්ඩලයේ ජන්ද 240 න් 142 ක් ලබාගනිමින් මීට සුළු මොහොතකට පෙර නිල වශයෙන් ජපාන අග්‍රාමාත්‍යවරයා ලෙස පත්විය.
ඒ අනුව නව අග්‍රාමාත්‍යවරයා සිය කැබිනට් මණ්ඩලය පත්කිරීමට නියමිත අතර හිටපු අග්‍රාමාත්‍ය ෂින්සෝ අබේ මහතාගේ කැබිනට මන්ත්‍රීන්ගෙන් බොහෝ පිරිසක් නව කැබිනට මණ්ඩලයට ද ඇතුලත්වනු ඇතැයි අපේක්ෂා කෙරේ.
65 හැවිරිදි ෂින්සෝ අබේ මහතා පසුගිය දා අග්රමාත්යධුරයෙන් ඉල්ලා අස්විය. ඒ ඔහුගේ පුද්ගලික සෞඛ්‍ය ගැටළුවක් හේතුවෙනි. නව අග්‍රාමාත්‍යවරයාට ගෝලීය කොරෝනා වයිරසය හමුවේ ජපානය මෙහෙයවීම මෙන්ම 2021 ඔලිම්පික් තරගාවලිය ඇතුළු විශාල අභියෝග රැසකට මුහුණ දීමට ජපානය පෙළගැස්විය යුතුය.
කාන්තාවන් ගෘහ සේවිකාවන් ලෙස විදේශගත වීම සුදුසු නොවේ- ගෞරවන්විත රැකියා සඳහා ඔවුන් යොමු කිරීම රජයේ අරමුණයි- ඇමති නිමල් සිරිපාල ද සිල්වා
කාන්තාවන් ගෘහසේවිකාවන් ලෙස රැකියා සඳහා විදේශගත කිරීමට තමන් පෞද්ගලිකව විරුද්ධ බවත්, ඔවුන්ට ගෞරවාන්විත රැකියා ලබා දීම රජයේ අරමුණ බවත්, කම්කරු අමාත්‍ය නිමල් සිරිපාල ද සිල්වා මහතා ප්‍රකාශ කළේය.
දියේ ගිලෙමින් සිටි තරුණිය බේරා ගන්නවා වෙනුවට, 300ක පමණ පිරිසක් එය වීඩියෝ කරලා - පොලිසියෙන් දඩ
කටුගස්තොට පාලමෙන් ගඟට පැන්න තරුණියක දියේ ගිලෙමින් සිටියදී පාලම මත මාර්ගය අවහිර වනසේ වාහන නවත්වා තරුණිය දියේ ගිලෙන දර්ශන ජංගම දුරකථන මගින් වීඩියෝ ගත කළ බව කියන රියැදුරන් 15 දෙනකුට තරයේ අවවාද කරමින් රුපියල් 2000.00 බැගින් දඩ පත්රිකා නිකුත් කිරීමට. කටුගස්තොට පොලිසිය පියවර ගෙන ඇත.
පසුගිය 11 වෙනි දින පෙරවරුවේ මෙම තරුණිය පේ‍්‍රම සම්බන්ධතාවක් හේතුවෙන් ඇතිවූ සිත්තැවුලක් නිසා ගඟට පැන ඇති අතර ඇය එහිදී මරණයට පත්ව ඇත. එම අවස්ථාවේ 300 ක පමණ පිරිසක් පාලම මතට රැස්ව තරුණිය දියේ ගිලෙන ආකාරය ජංගම දුරකතන මගින් වීඩියෝ ගත කරමින් සිට ඇත.
පාලම මතින් ගමන් ගනිමින් තිබූ වාහනවල රියැදුරන්ද වාහන පාලම මතම නවත්වා සිද්ධිය විඩියෝ ගත කිරීමට උත්සහ කිරීම නිසා මාර්ගයේ දැඩි වාහන තදබදයක් ඇතිවූ බව පොලිසිය පවසයි. මාර්ගය අවහිර වනසේ රථවාහන නවතා තැබීම යටතේ අදාළ රියැදුරන්ට දඩ පත්රිකා නිකුක් කර තිබේ.
පුරවැසි වගකීම් අමතක කරසෙසු ජනතාවටද අපහසුතාවට පත්වන සේ යළිත් කටයුතු නොකරන ලෙස අදාළ පිරිසට අවවාද කිරීමට කටුගස්තොට පොලිසියේ ස්ථානාධිපතිවරයා පියවරගෙන ඇත.
පළාත් සභා ඡන්ද ක්රමය අහෝසිකළ යුතුයි - යෝජනාව සම්මතයි
"පළාත් සභා ඡන්ද ක්රමය අහෝසිකළ යුතුයි" යන යෝජනාව වලල්ලාවිට ප්‍රාදේශිය සභාවේදී අද (15) ඒකමතිකව සම්මත වී තිබේ.
ශ්‍රී ලංකා නිදහස් පක්ෂ ප්‍රදේශිය සභා මන්ත්‍රී නාලක තරංග සමරසිංහ මහතා එම යෝජනාව ප්‍රාදේශීය සභාවට ඉදිරිපත් කර ඇත.
පසුව මේ සම්බන්ධයෙන් මන්ත්‍රීවරුන්ගේ ඡන්ද විමසුමක් සිදු කළ බවත් ඒ අනුව
වලල්ලාවිට ප්‍රාදේශිය සභාවේ මන්ත්‍රීවරුන් 25 දෙනාගෙන් අද පැමිණ සිටියේ මන්ත්‍රීවරුන් 23 දෙනෙක් පමණක් වන පසුබිමක
එම 23 දෙනාගෙන් එක් මන්ත්‍රීවරයෙක් ඡන්දය විමසන අවස්ථාවේදී සභාවෙන් පිටතට ගොස් සිටි බවත් තවත් එක් මන්ත්‍රීවරයෙන් ඡන්දය ප්‍රකාශ නොකර සිටි බවත් වාර්තා විය
අනෙක් මන්ත්‍රීවරුන් 21 දෙනාම "පළාත් සභා ඡන්ද ක්රමය අහෝසි කළ යුතුයි" යන යෝජනාවට පක්ෂව ඡන්දය ප්‍රකාශ කළ බැවින් එම යෝජනාව එකමතිකව සම්මත වී ඇත.
කොළඹ මාර්ග නීති කඩකරන රථවාහන සඳහා දඩ පත්රිකා නිවසටම එවන CCTV මෙහෙයුම ඇරඹෙයි.
කොළඹ නගරය තුළ මාර්ග නීති උල්ලංඝනය කරන රියැදුරන් සී සී ටී වී කැමරා පද්ධතිය ඔස්සේ හඳුනාගෙන ඔවුන්ට තැපැල් මාර්ගයෙන් දඩ පත්රිකා නිවසට යැවීමේ වැඩපිළිවෙළක් ලබන සඳුදා (21 වැනිදා) සිට ආරම්භ කරන බව බස්නාහිර පළාත් රථවාහන අංශය සහ නාගරික රථවාහන අංශයේ අධ්‍යක්‍ෂ ජ්‍යෙෂ්ඨ පොලිස් අධිකාරි කමල් පුෂ්පකුමාර පැවසීය.
කොළඹ නගරය තුළ සීසීටීවී කැමරා 108 ක් සවිකර ඇති අතර කැමරා පද්ධති සවි කළ පොලිස් වෑන් රථ තුනක් ස්ථාන ගත කර තිබේ. ඒවා මගින් මාර්ග නීති උල්ලංඝනය කරන පුද්ගලයන් හඳුනා ගන්නා බව ජ්‍යෙෂ්ඨ පොලිස් අධිකාරිවරයා කියා සිටියේය.
පැය 24 පුරාම මෙම කි‍්‍රයාවලිය සිදු කරන අතර මාර්ග නීති උල්ලංඝනය කරන පුද්ගලයන්ගේ තොරතුරු මෝටර් රථ ලියාපදිංචි කරන දෙපාර්තමේන්තුව හරහා ලබාගෙන ඔවුන්ට දඩ පති‍්‍රකා නිවසට යැවීමේ වැඩපිළිවෙළ කි‍්‍රයාත්මක කිරීමට නියමිතය.
මේ පිලිබදව ජ්‍යෙෂ්ඨ පොලිස් අධිකාරි කමල් පුෂ්පකුමාර මහතා කියා සිටියේ කොළඹ නගරයට ඇතුළු වන ප්රධාන මාර්ගවල සිට කොළඹ නගරයේ වාහන ධාවනය කරන ප්රධාන මාර්ග 5 තුළම මෙම කැමරා පද්ධතිය ඔස්සේ රථවාහන වැරදි කරන රියැදුරන් හඳුනා ගැනීමේ වැඩපිළිවෙළ කි‍්‍රයාත්මක කර ඇති බවයි.
මෙහිදී ජ්‍යෙෂ්ඨ පොලිස් අධිකාරිවරයා මෙසේද කියා සිටියේය.
දැඩි රථවාහන තදබදයක් පවතින අවස්ථාවල රථ වාහන වැරදි කරන පුද්ගලයන්ට දඩ පති‍්‍රකා ලබාදීම ඉතාම අපහසු කටයුත්තක්. ඒ දේ කරන්න ගියොත් වාහන තදබදය තවත් වැඩි වෙන්න පුළුවන්.
ඒ නිසා තමයි පොලිස් රථ වාහන අංශය මේ ආකාරයට සීසීටීවී කැමරා පද්ධතිය ඔස්සේ වැරදිකරුවන් හඳුනාගෙන ඔවුන්ට දඩ පති‍්‍රකා නිවසට යැවීමේ වැඩපිළිවෙළක් ආරම්භ කරන්නේ.
ඒ වගේම මන්තීරු නීතිය කි‍්‍රයාත්මක කිරීමට ඊයේ කිිසියම් ගැටලූ සහගත තත්ත්වයක් ඇතිවෙලා තිබුණා. ඒත් ඒ ගැටලූ හඳුනාගෙන අපි මේ ක්රමය සාර්ථකව ඉදිරියට කි‍්‍රයාත්මක කරන්න කටයුතු කරනවා.
මේ මංතීරු නීතිය සාර්ථක කර ගන්න වාහන පදවන පුද්ගලයන් සහාය විය යුතුයි. මේ ක්රමය දිගටම කි‍්‍රයාත්මක කළොත් කොළඹ නගරයේ රථවාහන තදබදයට ඉතාම සාර්ථක පිළියමක් දෙන්න පුළුවන්.
ඒ වගේම මාර්ග නීති කඩ කරන පුද්ගලයන්ට ඉදිරියේදී කිසිම සමාවක් ලබා දෙන්නේ නැහැ. මාර්ග නීති කඩ කරන පුද්ගලයන් සීසීටීවී කැමරා ඔස්සේ හඳුනාගෙන ඔවුන්ට දඩ පති‍්‍රකා නිකුත් කිරීම සඳහා රථ වාහන අංශයේ විශේෂ පොලිස් කණ්ඩායම් යොදවා ඇති බවද ජ්‍යෙෂ්ඨ පොලිස් අධිකාරි කමල් පුෂ්පකුමාර මහතා වැඩිදුරටත් කියා සිටියේය.
