ජනතා විමුක්ති පෙරමුණ සහ අමාත්‍ය අලස් සම්බන්ධ කර ගනිමින් මාධ්‍ය හමුවකදී කළ ප්‍රකාශයක් සම්බන්ධයෙන් මහජන ආරක්‍ෂක අමාත්‍ය ටිරාන් අලස් මහතා කළ පැමිණිල්ලකට අදාළව පෙරටුගාමී සමාජවාදී පක්ෂයේ ක්‍රියාකාරිකයෙකු වන දුමින්ද නවගමුව මහතාට සැප්තැම්බර් 6 වැනිදා කොළඹ කොටුව මහේස්ත්‍රාත් අධිකරණය හමුවේ පෙනී සිටින ලෙස නොතීසි නිකුත් කර තිබේ.
සිද්ධිය සම්බන්ධයෙන් පරීක්ෂණ පවත්වන අපරාධ පරීක්ෂණ දෙපාර්තමේන්තුව දුමින්ද නාගමුව මහතා සිටින ස්ථානය සොයා ගැනීමට නොහැකි වූ බැවින් ඔහුට අධිකරණය හමුවේ පෙනී සිටින ලෙස නොතීසි නිකුත් කරන ලෙස ඉල්ලා සිටියේය. සිද්ධිය සම්බන්ධයෙන් සිදු කෙරෙන විමර්ශනයේ කොටසක් ලෙස දුමින්ද නවමුව මහතාගෙන් ප්‍රකාශයක් සටහන් කර ගැනීමට අපේක්ෂා කරන බව රහස් පොලිසිය අධිකරණයට දන්වා සිටියේය.
ටිරාන් අලස් සහ ජනතා විමුක්ති පෙරමුණ යුරෝපීය දූපතක් වන මෝල්ටාවේ අක්වෙරළ ගිණුමක් පවත්වාගෙන යන බවට නාගමුව අගෝස්තු 12 දා මාධ්‍ය හමුවකදී ප්‍රකාශයක් කළ බව අලස් ඇමැතිවරයා සිය පැමිණිල්ලේ සඳහන් කළේය. මෙම ප්‍රකාශය අසත්‍ය සහ පදනම් විරහිත බව පවසමින් අමාත්‍යවරයා මෙම පැමිණිල්ල ඉදිරිපත් කළේ මෙම ප්‍රකාශය සම්බන්ධයෙන් පරීක්ෂණයක් පවත්වන ලෙස ඉල්ලමින්ය.