පළාත් පාලන ආයතන තුළ 25%ක තරුණ නියෝජනයක් අනිවාර්ය කිරීම සඳහා වන පනත් කෙටුම්පතක් ඉදිරිපත් කිරීමට අදහස් කරන බව පාර්ලිමේන්තු මන්ත්‍රී ප්‍රේම්නාත් සී දොළවත්ත මහතා ප්‍රකාශ කළේය.
මෙම වැදගත් යෝජනාව මගින් තරුණ පුරවැසියන්ගේ ඉදිරිදර්ශන පාලන ක්‍රියාවලියට සම්බන්ධ කිරීමට ඇති කැපවීම අවධාරනය කරයි. අහිමි වූ අවස්ථාවක් නැවත ලබා දීම මෙම වැඩසටහනේ අරමුණ බව මන්ත්‍රීවරයා අවධාරණය කළේය. ඔහු මෙම උත්සාහය සාක්ෂාත් කර ගැනීම සඳහා පාර්ලිමේන්තු සගයන්ගේ සහ සාමාන්‍ය මහජනතාවගේ සහයෝගය ලබා ගැනීම අත්‍යවශ්‍ය බව ද මන්ත්‍රීවරයා පළ කළේය.
පාර්ලිමේන්තු මන්ත්‍රී ප්‍රේම්නාත් සී දොළවත්ත මහතා මෙම අදහස් පළ කළේ (18) ජනාධිපති මාධ්‍ය මධ්‍යස්ථානයේ (PMC) කැඳවා තිබූ මාධ්‍ය හමුවකදීය.
ජනාධිපති රනිල් වික්‍රමසිංහ මහතාගේ න්‍යාය පත්‍රය කේන්ද්‍රගත වී ඇත්තේ අපේ ජාතියේ තරුණ තරුණියන්ට අවස්ථා ලබා දීම සහ තීරණ ගැනීමේ රාමුව තුළ ඔවුන් ක්‍රියාකාරීව සම්බන්ධ කර ගැනීමට පහසුකම් සැලසීම බව ද මන්ත්‍රීවරයා අවධාරණය කළේය.