භයානක මත්ද්‍රව්‍යවල පිරිසිදු ප්‍රමාණය ග්‍රෑම් 10ට වඩා අඩු වූ විට, පුද්ගලයෙකුට ඇප ලබාදීමේ බලය මහාධිකරණයට ලැබේ.

2022 සංශෝධන පනත මගින් සංශෝධිත අන්තරායකර ඖෂධ ආඥා පනතේ 84 සහ 85 වගන්ති ඇප ලබාදීමට අදාළ වන බව සම්පත් අබේකෝන් සහ පී කුමාරරත්නම් යන විනිසුරුවරුන්ගෙන් සමන්විත අභියාචනාධිකරණ ද්විපුද්ගල විනිසුරු මඩුල්ල තීරණය කළේය.

“යමෙකු ළඟ තබාගෙන හෝ ප්‍රවාහනය කළා යැයි කියන භයානක මත්ද්‍රව්‍යවල පිරිසිදු ප්‍රමාණය ග්‍රෑම් 10ට වඩා අඩු වූ විට, නීතිපතිවරයා මිස, මාස 12ක අත්අඩංගුවේ පසුවූ පුද්ගලයකු ඇප මත මුදා හැරීම හැර වෙනත් විකල්පයක් අදාළ මහාධිකරණයට නැත. 2022 අංක 41 දරන සංශෝධන පනත මගින් සංශෝධිත ආඥා පනතේ 85 වැනි වගන්තිය ප්‍රකාරව ක්‍රියා කර නියෝගයක් ලබාගෙන ඇත,” විනිසුරු අබේකෝන් නිරීක්ෂණය කළේය.

2022 අංක 41 දරන පනතින් සංශෝධිත විෂ, අබිං සහ අන්තරායකර ඖෂධ ආඥා පනතේ 83 වගන්තිය ප්‍රකාරව විත්තිකරුට ඇප මත මුදා හැරීමට හිමිකම් ඇති බවට විත්තිකරුවෙකු ප්‍රතිශෝධන අයදුම්පතක් ගොනු කර තිබුණි. සන්තකයේ තබාගෙන ප්‍රවාහනය කළ බව කියන මත්ද්‍රව්‍යවල පිරිසිදු ප්‍රමාණය ග්‍රෑම් 10 ට වඩා අඩු ප්‍රමාණයකි, එනම් ග්‍රෑම් 9.426 ක් වන අතර, එවැනි ප්‍රමාණයක් සන්තකයේ තබා ගැනීම සඳහා පුද්ගලයකු රිමාන්ඩ් භාරයේ තබා ගත හැකි උපරිම කාලය මාස 12 කි.

2022 අංක 41 දරන සංශෝධන පනතට අනුව හෙරොයින් ග්‍රෑම් 5කට වැඩි ප්‍රමාණයක් සන්තකයේ තබාගෙන සිටින පුද්ගලයකුට මරණ දඬුවම නියම කළ හැකි බැවින් ඇප ඉල්ලීමට මහාධිකරණයේදී නීතිපතිවරයා විරෝධය පළ කර තිබිණි. ඇප දීමට මහාධිකරණයට බලයක් නැත.

කෙසේ වෙතත්, නව සංශෝධනවලින් පසුව ඇති නීතිමය ප්‍රතිපාදන සැලකිල්ලට ගනිමින් අභියාචනාධිකරණය මහාධිකරණ නියෝගය ඉවත දමා විත්තිකරුවන්ට ඇප ලබාදීමට තීරණය කළේය. විත්තිකරු විසින් සන්තකයේ තබාගෙන ප්‍රවාහනය කළ බව කියන භයානක මත්ද්‍රව්‍ය ප්‍රමාණය හෙරොයින් ග්‍රෑම් 9.426 ක් වූ බැවින් විත්තිකරුට ඇප නියම කිරීමට අධිකරණය නියෝග කළේය.