හිඟ විදුලි බිල්පත් නොගෙවීම හේතුවෙන් විසන්ධි වූ බදුල්ල ශික්ෂණ රෝහලේ අංශ කිහිපයක විදුලි සැපයුම (11) පෙරවරුවේ යථා තත්ත්වයට පත් කර ඇත.

රෝහලේ විදුලි බිල රු. මිලියන 70ක් වූ අතර, (10) උදෑසන ලංවිම හෙද පුහුණු මධ්‍යස්ථානයට, වෛද්‍ය නිල නිවාසයට සහ හෙද නේවාසිකාගාරයට විදුලිය විසන්ධි කර තිබේ.

කෙසේ වෙතත්, රෝහල් පරිපාලනය විසින් රු. මිලියන 20ක් ගෙවා ඇති අතර ඉතිරි හිඟ මුදල සතියක් ඇතුළත ගෙවන බව ලංවිමට ලිඛිතව දැනුම් දීමෙන් පසු එම විසන්ධි වූ විදුලි සැපයුම යථා තත්ත්වයට පත් කිරීමට ලංවිම කටයුතු කළේය.

රජයේ වෛද්‍ය නිලධාරීන්ගේ සංගමයේ (GMOA) ඌව පළාත් සම්බන්ධීකාරක වෛද්‍ය පාලිත රකපක්ෂ මහතා පැවසුවේ රෝහල් පරිපාලනයේ වගකීම් විරහිත කළමනාකාරීත්වය හේතුවෙන් වෛද්‍යවරුන් සහ රෝහල් කාර්ය මණ්ඩලය පීඩාවට පත්ව සිටින බවයි.

මේ අතර, බදුල්ල ශික්ෂණ රෝහලේ ජල ගාස්තු ඇතුළු අනෙකුත් බිල්පත් ගෙවීම් මිලියන 9.8 ක් ද පැහැර හැර ඇත බව ජනතා විමුක්ති පෙරමුණේ හිටපු ඌව පළාත් සභා මන්ත්‍රී සමන්ත විද්‍යාරත්න හෙළි කරයි.