74වන ජාතික නිදහස් දින උළෙලට සමගාමීව කොළඹ නගරය සහ බස්නාහිර පළාත ආවරණය වන ලෙස විශේෂ ආරක්ෂක සැලැස්මක් ක්‍රියාත්මක කෙරන බවත්, ඒ සදහා ශ්‍රී ලංකා පොලිසියත්, විශේෂ කාර්යය බළකාය, ත්‍රිවිධ හමුදාවේ ද සහය ඇතිව නිළධාරීන් 3000 කට අධික පිරිසක් යොදවා ඇති බවත්, බස්නාහිර පළාත් ජ්‍යෙෂ්ඨ නියෝජ්‍ය පොලිස්පති දේශබන්දු තෙන්නකෝන් මහතා අද (31) රජයේ ප්‍රවෘත්ති දෙපාර්තමේන්තුවේ පැවති මාධ්‍ය හමුවේ දී පැවසීය.

අභිමානවත් 74 වන නිදහස් උත්සවය පැවැත්වෙන පෙබරවාරි මස 04 දින මාර්ග 21 ක ගමනාගමනය සීමා කෙරෙන බවත්, එමඟින් ජනතාවට අපහසුතාවයක් නොවන පරිදි එම මාර්ග වලට අදාළ විකල්ප මාර්ග භාවිතා කිරීමට අවශ්‍ය කටයුතු සුදානම් කර ඇති බවත් හෙතෙම කියා සිටියේය.

පුහුණුවීම් කටයුතු ජනවාරි 29 වන දිනයේ ආරම්භ වීමත් සමඟ එකී පුහුණුවීම් පෙබරවාරි 03 දක්වා පැවැත්වෙන හෙයින් නිදහස් චතුරශ්‍රය හා ඒ අවට ප්‍රදේශ වල රථවාහන තදබදය අවම කිරීම සඳහා පෙරවරු 06.00 සිට පස්වරු 02.00 දක්වා මාර්ගවල යම් යම් සීමා කිරීම් සිදු කෙරෙන බවත්, එහෙත් මහජනතාවට ඇතිවන අපහසුතාවයන් සහ තදබදය අවම වන ආකාරයට එම පෙළපාලි පුහුණු වීම් සිදුකරනු ලබන බවත්, පුහුණු වීම් සිදුකරන කාලයේ දී පමණක් අත්‍යවශ්‍යම මාර්ග පමණක් වසා තැබෙන බවත් දේශබන්දු තෙන්නකෝන් මහතා මෙහි දී ප්‍රකාශ කර සිටියේය.

තව ද, උත්සවයට පැමිණෙන ආරාධිත අමුත්තන් සඳහා ආරාධනා පත්‍රය සමඟ ලබා දී ඇති රථගාල් කිරීම සම්බන්ධ වූ ලේබලය සහිතව පෙරවරු 7.30 ට පෙර පැමිණෙන ලෙස සියලු ආරාධිත අමුත්තන්ගෙන් ඉල්ලා සිටින බව ද දැනුම් දෙන ලදී.