මාර්ගයේ ඇති නිදහස අයුතු ලෙස භාවිතා කරමින් අපරික්ෂාකාරී ලෙස මෝටර් රථ සහ යතුරු පැදි ධාවනය කිරීම හේතුවෙන් නිරෝධායන ඇඳිරි නීතිය ආරම්භ වූ පසුගිය අගෝස්තු මස 20 දා සිට සැප්තැම්බර් මස 13 වන දා දක්වා සිදුවූ මාර්ග අනතුරු 63ක් බවත්, එම අනතුරුවලින් 66 දෙනෙකු මියගොස් ඇති බවත්, පොලිස් මාධ්‍ය ප්‍රකාශක ජ්‍යේෂ්ඨ පොලිස් අධිකාරි නීතිඥ නිහාල් තල්දූව මහතා පවසයි.
රට අර්ධවශයෙන් වසා ඇති මෙම සමයේ සිදුවූ රිය අනතුරු සම්බන්ධයෙන් මාධ්‍ය වෙත අදහස් දක්වමින් පොලිස් මාධ්‍ය ප්‍රකාශකවරයා මේ බව පැවසීය.
මෙම අනතුරුවලට හේතුව අපරික්ෂාකාරී රය පැදවීම බවත් සිදුවූ අනතුරුවලින් 56ක්ම අපරික්ෂාකාරී ලෙස රිය හා යතුරුපැදි ධාවනය මගින් සිදුවී ඇති බවත් පොලිස් මාධ්‍ය ප්‍රකාශකවරයා පැවසීය.
මාර්ග අනතුරුවලින් මියගිය 66 දෙනාගෙන් 31 දෙනෙකුම යතුරුපැදි කරුවන් බවත්, ඉතා අපරික්ෂාකාරී ලෙස යතුරුපැදිකරුවන් මේ මොහොතේ යතුරුපැදි හසුරවන බවත්, එම හේතුවෙන් මෙම මරණ සිදුවී ඇති බවත්, පොලිස් මාධ්‍ය ප්‍රකාශකවරයා වැඩිදුරටත් පැවසීය.