කොවිඩ් 19 වසංගත තත්ත්වයට ප්‍රශස්ථ ලෙස මුහුුණ දීමට නම් මිත්‍යා විශ්වාස පසුපස යාම වෙනුවට විද්‍යානුකූල ක්‍රියාවලියට මුළිකත්වය ලබා දිය යුතු බව පරිසර අමාත්‍යාංශයේ ලේකම් විශේෂඥ වෛද්‍ය අනිල් ජාසිංහ මහතා පවසනවා.
නව වසරේ රාජකාරි කටයුතු ඇරඹීම අද දින පරිසර අමාත්‍යාංශයේ දී ආරම්භ කරමින් ඔහු මේ බව සඳහන් කළා.
රාජ්‍ය පරිපාලන අමාත්‍යාංශය විසින් ලබා දී ඇති උපදෙස් පරිදි සෞඛ්‍ය ආරක්ෂණ පිළිවෙත් අනුගමනය කරමින් එම කටයුතු අද දින ආරම්භ කරන ලද්දේ පරිසර අමාත්‍යාංශයේ ලේකම් විශේෂඥ වෛද්‍ය අනිල් ජාසිංහ මහතාගේ ප්‍රධානත්වයෙන්.
එහිදී ලේකම්වරයා කොවිඩ් 19 වසංගත තත්ත්වය සම්බන්ධව දීර්ඝ ලෙස අදහස් දක්වනු ලැබුවා.
“කොවිඩ් 19 වයිරස් තත්ත්වය පාලනය සඳහා විවිධ නව සොයා ගැනීම් ලෝකය පුරා සිදුවෙමින් තිබෙනවා. අපේ රටේ එක් කණ්ඩායමක් විදයානුකූල ක්‍රියාවලිය පිළිබඳ විහ්වාසය තබා ඇතත් තවත් පිරිසක් විද්‍යාත්මක ක්‍රමවේදයන් තිබිය දී මිථ්‍යා විශ්වාසයන් පසුපස ගමන් කරන ස්වභාවයක් දක්නට ලැබෙනවා. කොවිඩ් 19 මැඩීමට අප විසින් කළ යුත්තේ විද්‍යානුකූල ක්‍රමවේදයන් අනුගමනය කිරීම විනා මිත්‍යා විශ්වාසයන් පසුපස යාම නොවෙයි.
කොවිඩ් 19 කියන්නේ මුළු ලෝකයම අසරණ කළ වයිරසයක්. අද සමහර රටවල් සමාජයීිය දිළිඳුභාවයට පත්ව තිබෙනවා. එයට හේතුව තමයි බොහෝ රටවල ආදායම් බෙදී යාමේ විසමතාවය. අපි සංවර්ධනය වෙමින් පවතින රටක් වුවද ආදායම් බෙදී යාමේ විසමභාවය ලොව අනිත් රටවලට වඩා අඩුයි. ඒ නිසා තවමත් අපේ රටේ කොවිඩ් 19 වසංගත තත්ත්වය නිසා ආර්ථිකය අඩපණවීමකට ලක් ව නැහැ.
මේ වසරේ මැද වනවිට ලෝකය තුළ තවත් එන්නත් හතරක් හෝ පහක් අලුතින් හදුන්වා දෙනු ඇති. දැනටමත් එන්නත් ගණනාවක් සම්බන්ධව කතා බහ වෙනවා. එන්නත් නිපදවන සමාගම් විසින් ඉන් සියයට 20ක් මහජනතාවට නොමිළේ ලබා දෙනවා. ලෝකයේ හැම රටක්ම මේ එන්නත් ලබා ගැනීමට ලොකු උත්සාහයක් දරනවා. එමනිසා අප වැනි රටවලට එන්නත් ලබා ගැනීමේ දී ලොකු උත්සාහයක් දැරීමට සිදුවෙනවා. කොවිඩ් 19 වසංගත තත්ත්වයේ දී ලබා දෙන එන්නත මගින් සිදු කරන්නේ එම වයිරසයට ඔරොත්තු දිය හැකි පරිදි අපේ සිරුරේ ප්‍රතිශක්තිකරණය ඉහළ නැංවීමයි. සමාජය තුළ ප්‍රශස්ථ ලෙස ප්‍රතිශක්තිකරණය පවත්වාගෙන යාමට නම් සියලු ජනතාවගෙන් සියයට 70කට වත් එන්නත ලබා දිය යුතුයි. ඒක අසීරු ඉළක්කයක්. නමුත් අඩු තරමින් සියයට 50කටවත් එන්නත ලබා දෙන්නේ නම් එයත් යම් තරමකට සතුටුවිය හැකි තත්ත්වයක්.
එන්නත් නිපදවන සමාගම් විසින් එන්නත් නිපදවීම වේගවත් කරමින් කටයුතු කළ යුතු වෙනවා. එසේ නොවුනහොත් දුප්පත් රටවලට ප්‍රමුඛත්වය නොැලබෙන්නට පුලුවන්. එම තත්ත්වය මෙම වයිරසය මර්දනයට ගැටළුවක්.
අපේ රටේ ජනතාව පසුගිය වසරේ මාර්තු මාසයේ දී කොවිඩ් 19 ගැන දැන සිටි මට්ටමට වඩා දැන් විශාල දැනුම් සම්භාරයක් සහිතව සිටිනවා.ජනමාධ්‍ය ඔස්සේ හා සමාජ මාධ්‍ය ඔස්සේ කොවිඩ් 19 ගැන විවිධ තොරතුරු පළ වෙනවා. සිදුවිය යැත්තේ වඩාත් නිවැරදි තොරතුරු ලබා ගැනීම හා ලබා දීමයි. මෙම වයිරසය පාලනය කිරීමට සමාජය තුළ ට නිවැරදිම තොරතුරු ලබා දීමත් අවශ්‍ය වෙනවා.
අද සිදු විය යුත්තේ විද්‍යානුකූල කාරණාවන් සම්බන්ධව මුළික අවධානය යොමු කිරීම මිස මිත්‍යාවන් පසුපස යාම නොවේ. කොවිඩ් 9 වයිරසයට මුහුණ දීමට නම් අප රටේ ජනගහනයෙන් අඩු තරමින් සියයට 70 ඉළක්කයට යාම අසීරු වුවත් සියයට 50කටවත් එම එන්නත ලබා දිය යුතු වෙනවා.”