ජපන් මෝටර් රථ දැවැන්තයා වන ටොයෝටා සමාගම පියාඹන මෝටර් රථයක් අද සාර්ථකව අත්හදා බලා තිබෙනවා. ස්කයි ඩ්‍රයිව් (Sky Drive) යනුවෙන් හඳුන්වන මෙම පියාඹන මෝටර් රථය ටෝකියෝ හිදී අද ගුවන් ගත කළේ 2023 වසර වනවිට සම්පුර්ණයෙන් එය ටැක්සි රථයක් ලෙස වෙළඳ පළට හඳුන්වා දීමේ අටියෙන්. අද ගුවන් ගතකල ආදර්ශ මොඩලය හඳුන්වන්නේ SD -03 යන නමින්.
මුලින් ඇමෙරිකා ජපන් ඒකාබද්ධ ව්‍යාපෘතියක් වූ මෙම ගුවන් කාර් වැඩ පිළිවෙල සාර්ථකව යම් යම් අවස්ථාවල අත්හදා බැලීම් වලට ලක් කර තිබුනද එම ව්‍යාපෘතියේ වීඩියෝවක් සමාජ ගත කර ඇත්තේ අද ( 29 සිකුරාදා). ඒ ජපානයේ ටොයෝටා සිටි නම් කලාපයේ දී.
තනි පුද්ගලයෙකුට පමණක් ගමන් කල හැකි මෙම ගුවන් මෝටර් කාරය පොළෝ මට්ටමින් අඩි හයක් හතක් පමණ උසකින් ඉහල අහසේ විනාඩි පහක් පමණ දැලින් වටකළ නිශ්චිත අත්හදා බැලීමේ කලාපයක ගමන් කර තිබෙනවා. වැදගත් වන්නේ මේ පියාසර කිරීම සිදුකර ඇත්තේ එක් ගුවන් කාර් නියමුවෙක් ද සහිතව වීමයි.
මේ වනාහි ස්කයි ඩ්‍රයිව් සමාගමේ මුල්ම ගුවන් මෝටර් කාර් අත්හදා බැලීම වන අතර මේ සඳහා පුර්ණ දායකත්වය සපයා ඇත්තේ ටොයෝටා සමාගම. මේ අත්හදා බැලීම 2023 වනවිට අසුන් සහිත වාණිජ කාර් රථයක් මට්ටමට ගෙන ඒමට ටොයෝටා ඔටෝ මොබයිල් සමාගම දැන් සුදානම් වෙනවා.
අධික වාහන තදබදයක් සහිත ටෝකියෝ සහ ඕසකා යන නගර සඳහා ටැක්සි රථයක් ලෙස ඔවුන් මෙය මුලින් ම හඳුන්වා දෙනු ඇති. දැනට මේ රථයට ගමන් කල හැක්කේ ඉතාම අඩු වේගයක් යටතේ විනාඩි දහයක් පමණයි. නමුත් ඊළඟ පියවරේ දී ඔවුන් පැයට කිලෝ මීටර් 40ත් 60ත් අතර වේගයක් කරා ගමන් කරනු ඇති බව එම සමාගමේ ප්‍රධාන විධායක නිලධාරී ටොමොහීරෝ ෆුකුසාවා (Tomohiro Fukuzawa) මහතා ප්‍රකාශ කර සිටිනවා.
ඔහුගේ බලාපොරොත්තුව වන්නේ අධික වාහන තදබදයන් ඇති ලෝකයේ අනෙක් නගර සඳහාත් මේ රථය හඳුන්වා දීමට. 'මේ වර්ගයේ ගුවන් කාර් අත්හදා බැලීම් සියයක් පමණ මේ මොහොතේ පවා ලෝකයේ සෑම තැනම සිදු වෙමින් පැවතුනත් මිනිසෙක් සහිතව ගුවන් මෝටර් රථයක් සාර්ථකව ගුවන්ගත කළේ අපි' යනුවෙන් ඔහු එක්සත් පුවත්පත් (AP) සඳහා අද පැවසුවා.
මේ සාර්ථක අත්හදා බැලීම සමග මිනිසුන් මෙවන් රථයක ආරක්ෂාකාරීව ගමන් කිරීමට කැමති වනු ඇති යන්න ෆුකුසාවා ගේ මතයයි.
ලම්බාකාරව නැත්නම් සිරස් අතට ඉහළට නැංවිය හැකි සහ ගමන් කළ හැකි (vertical take off and landing - VTOL) මේ රථය ගුවන් යානයකින් සහ හෙලිකොප්ටරයකින් වෙනස් වන්නේ ගුවන් ගත කිරීම සහ ගොඩබෑම සඳහා වෙනම ගුවන් තොටුපළක් අවශ්‍ය නොවීම නිසයි. ගුවනින් මෙන්ම මහපාරේ ද දොරින් දොරට ගමන් කල හැකි මේ විශ්ම කර්ම වාහනය දිගින් මීටර් හතරක් සහ උසින් මීටර් දෙකක් වන අතර මෙය නගර ප්‍රවාහනය සඳහා ඉතාම යෝග්‍ය බවට ස්කයි ඩ්‍රයිව් සමාගමේ මත පළ කරනවා.
කෙසේ වුවද යටිතල පහසුකම් සහ ආරක්ෂාව පිළිබද කරුණු මත බොහෝ රටවල් මේ නව නිර්මාණය දෙස සැක සංකා සහිතව බලනු ඇති. එක්සත් ජනපදයේ පවා මෙවන් ව්‍යාපෘති කිහිපයක් අත්හදා බලමින් පැවතුනද ඒ සඳහා පුර්ණ අනුමැතිය තවමත් හිමිවී නැහැ.
කෙසේ වුවද ටොයෝටා අනුබද්ධ ස්කයි ඩ්‍රයිව් සමාගමේ මේ ව්‍යාපෘතිය ලොව මිනිස් රියදුරෙක් සහිතව ගුවන් ගතකළ ප්‍රථම මෝටර් රථය බවට ඉතිහාස ගත වනු ඇති.
පාස්කු ප්‍රහාරය පිටුපස සිටින සැබෑ වරදකරුවන් සොයා ඔවුන්ට දඩුවම් දෙන්නැයි අගරදගුරු අතිඋතුම් මැල්කම් කාදිනල් රංජිත් හිමිපාණන් රජයෙන් ඉල්ලා සිටිති.
කොවිඩ් -19 වැලඳුනු රෝගීන්ට ප්‍රතිකාර ලබාදීමට ගෙනයාමේදී මෙන්ම හදිසි අනතුරු සහ අනෙකුත් හදිසි කායික රෝග තත්ත්වවලදී සුවසැරිය (1990) ගිලන් රථ සේවාව උපයෝගී කරගන්නා ලෙසම මානසික රෝග වලින් පෙලෙන්නන් හදිසියේ රෝහල් ගත කිරීමට සිදුවන විටදී ද එම සේවාව ලබාදීමට සෞඛ්‍ය අමාත්‍යාංශයේ මැදිහත්වීමෙන් නව වැඩපිළිවෙලක් ඇරඹෙයි.
2020 වර්ෂයේ අධ්‍යයන පොදු සහතික පත්‍ර උසස් පෙළ විභාගය 2020 ඔක්තෝබර් 12 වැනි දින සිට 2020 නොවැම්බර් 06 වැනි දින දක්වා පැවැත්වීමට තීරණය කර ඇත.
ඒ අනුව 2020 ඔක්තෝබර් 10 දින සිට 2020 නොවැම්බර් 08 වනදා දක්වා පාසල් නිවාඩු ලබා දෙනු ලැබේ.
2020 වර්ෂය සඳහා නියමිත 5 ශ්‍රේණි ශිෂ්‍යත්ව විභාගය 2020 ඔක්තෝබර් 11 වැනි ඉරිදා දින පැවැත්වීමට තීරණය කර ඇත.
තෙවැනි පාසල් වාරය 2020 නොවැම්බර් 09 වැනි දායින් ආරම්භ වී 2020-දෙසැම්බර් 23 දායින් අවසන් වේ.
දෙසැම්බර් 24 වැනි දා සිට 2021 ජනවාරි 01 දක්වා 2020 වසරේ වාර අවසාන නිවාඩුව ක්‍රියාත්මක වෙයි.
2021 වසරේ නව පාසල් වාරය ජනවාරි 04 වැනිදායින් ආරම්භ කිරීමට තීරණය කර ඇත.
මත්ස්‍ය ආනයනයට වාර්ෂිකව වැය කෙරෙන විදේශ විනිමය පහත හෙළීම පැතිකඩ කිහිපයකින් සැලසුම් කළයුතුව ඇතැයි ජනාධිපති ගෝඨාභය රාජපක්ෂ මැතිතුමා පවසයි.
මාළු, කරවල, උම්බලකඩ සහ ටින් මාළු ආනයනයට වාර්ෂිකව රජය ඩොලර් මිලියන 500කට ආසන්න මුදලක් වැය කර තිබේ. ධීවර කර්මාන්තය දළ දේශීය නිෂ්පාදනයට මෙතෙක් දී ඇති දායකත්වය 1%කි. රට වටා මුහුදු තීරයෙන් සහ රට අභ්‍යන්තරයේ ඇති වැව් පද්ධතියෙන් නිසි ඵල ගෙන විදේශ විනිමය උපයන අපනයන අතරට ධීවර කර්මාන්තය පත්විය යුතුයැයි ජනාධිපතිතුමා අවධාරණය කරයි.
විසිතුරු මසුන්, මිරිදිය මත්ස්‍ය සහ ඉස්සන් ඇති කිරීම, ධීවර වරාය සංවර්ධන, බහුදින ධීවර කටයුතු සහ මත්ස්‍ය අපනයන රාජ්‍ය අමාත්‍යාංශයේ ඉදිරි සැලසුම් පිළිබඳව 27 පස්වරුවේ ජනාධිපති කාර්යාලයේ පැවති සාකච්ඡාවේදී ජනාධිපතිතුමා මේ බව සඳහන් කළේය.
විසිතුරු මත්ස්‍ය අපනයනයේදී මිරිදිය මත්ස්‍යයින් 95%ක් සහ කරදිය මත්ස්‍යයින් 98%ක් දේශීයව අභිජනනය කර අපනයනය කෙරේ. විසිතුරු මත්ස්‍ය වර්ග 700කට ආසන්න සංඛ්‍යාවක් අපනයනය කිරීමේ හැකියාව ඇතැයි විසිතුරු මත්ස්‍ය කර්මාන්තකරුවෝ පෙන්වා දුන්හ. මෙරටට ආවේණික මිරිදිය මත්ස්‍යයින් අභිජනනය කර අපනයනය කිරීමෙන් වැඩි විදේශ විනිමයක් උපයා ගැනීමේ හැකියාව ද සාකච්ඡාවට ලක් කෙරිණ.
ලොව විශාල ඉල්ලුමක් ඇති ජලජ පැළෑටි ආනයනය කර නිෂ්පාදනාගාර තුළ වගා කර නැවත අපනයනයට පවතින බාධක ලිහිල් කිරීමට ඇති ඉඩකඩ සොයා බලන්නැයි ජනාධිපතිතුමා නිලධාරීන්ට උපදෙස් දුන්නේය.
රට අභ්‍යන්තරයේ ඇති වැව් සංඛ්‍යාව 18,000ක් පමණ වේ. එහෙත් මිරිදිය මත්ස්‍ය කර්මාන්තයට යොදාගෙන ඇත්තේ 1500කට ආසන්න වැව් සංඛ්‍යාවකි. කර්මාන්තයේ ප්‍රවර්ධනය සඳහා මිරිදිය මසුන් බෝ කළ හැකි වැව් හඳුනාගෙන ග්‍රාමීය ප්‍රෝටීන අවශ්‍යතාව සපුරාලීය හැකියැයි ආර්ථික පුනර්ජීවනය පිළිබඳ ජනාධිපති කාර්ය සාධක බලකායේ ප්‍රධානී බැසිල් රාජපක්ෂ මහතා පැවසීය.
මිරිදිය මත්ස්‍ය ප්‍රවර්ධනයට මත්ස්‍ය පැටව් 90,000ක් වැව්වලට මුදාහැරීමට සැලසුම් කර තිබේ.
අධිශීතකරණ සහ සනීපාරක්ෂක පහසුකම් සහිත බහුදින යාත්‍රා නිෂ්පාදනය කිරීමේ අවශ්‍යතාව සහ ධීවරයන්ට වෘත්තියේ පුහුණුවක් දීමේ අවශ්‍යතාව සාකච්ඡාවට ලක් විය.
ධීවරයන්ට හෝ යාත්‍රාවලට හෝ සේවා සැපයීමට නොහැකි මට්ටමට ධීවර සංස්ථාව දැඩි මූල්‍ය අර්බුදයකට පත්ව ඇතැයි අනාවරණය කෙරිණ. 2017 වසරේදී ඉදි කළ අධිශීතාගාර අකර්මන්‍ය වී තිබේ.
ක්‍රියාත්මක තත්ත්වයේ ඇති අධිශීතාගාර පසුගිය පාලන සමයේදී වසර 33ක් වැනි දීර්ඝ කාලයකට පෞද්ගලික ව්‍යාපාරිකයින්ට බදු දී ඇතැයි ධීවර කර්මාන්තයේ නිරත පිරිස් සඳහන් කළහ.
එය ධීවර කර්මාන්තය බිඳ දැමීමේ අරමුණින් කරන ලද්දකැයි ඔව්හු කියා සිටියහ.
කරවල නිෂ්පාදනයේදී මෙරට සාගරයෙන් සපයා ගත නොහැකි මත්ස්‍යයින් පමණක් ආනයනය කළයුතු බව ජනාධිපතිතුමා කීය.
මුහුදු සීමාවේ මත්ස්‍ය අස්වැන්න ප්‍රවර්ධනයට හඳුනාගත් ස්ථාන 172ක කෘත්‍රීම අභිජනන මධ්‍යස්ථාන ඇති කිරීම සඳහා භාවිතයෙන් ඉවත් කර ඇති දුම්රිය මැදිරි, බස් රථ සහ ධීවර යාත්‍රා සාගර පතුළේ තැන්පත් කිරීමට තීරණය කෙරිණ.
ටින් මාළු නිෂ්පාදනයට අවශ්‍ය මත්ස්‍ය අවශ්‍යතාව දේශීයව සපුරාගන්නැයි ද ජනාධිපතිතුමා උපදෙස් දුන්නේය.
මෙරට ධීවරයින්ට සහ ධීවර කර්මාන්තයට සහයවීමට අවශ්‍ය නැව් දේශීය ආයතන මගින් නිෂ්පාදනය කළ යුතුයැයි ජනාධිපතිතුමා සඳහන් කළේය.
රාජ්‍ය අමාත්‍ය කාංචන විජේසේකර, ජනාධිපති ලේකම් පී.බී. ජයසුන්දර යන මහත්වරු සහ කැබිනට් සහ රාජ්‍ය අමාත්‍යාංශ ලේකම්වරු ඇතුළු නිලධාරිහූ, ධීවර කර්මාන්තය ආශ්‍රිත නිෂ්පාදකයෝ සහ ව්‍යාපාරිකයෝ සාකච්ඡාවට එක්ව සිටියහ.
– ජනාධිපති මාධ්‍ය අංශය