මේ සම්බන්ධයෙන් විදුහල්පතිවරුන් සහ පාසල් ප්‍රජාව දැනුවත් කිරීම පිණිස මේ වනවිටත් සියලු පළාත් අධ්‍යාපන බලධාරීන් හා සියලු ක්‍රීඩා සංගම් ප්‍රධානීන් දැනුවත් කර ඇත. ඒ අනුව මෙරට පාසල් ක්‍රීඩාවල යෙදෙන ක්‍රීඩකයින් ඔවුන් සම්බන්ධ වන ක්‍රීඩා තරඟ අනුව, කොවිඩ් හේතුවෙන් මතුවිය හැකි අවදානම් තත්ත්වය සැලකිල්ලට ගෙන කාණ්ඩ 4ක් යටතේ වර්ගීකරණයට ලක්කර සෞඛ්‍ය අමාත්‍යාංශයේ විධිවිධානවලට යටත් ව අදාළ ක්‍රීඩා කටයුතු සිදුකළ යුතු බවට උපදෙස් ලබා දී තිබේ.
ක්‍රීඩා කටයුතුවල දී අත් සේදීම, ශ්වසන ආචාර විධි පවත්වා ගැනීම, දුරස්ථභාවය පවත්වාගැනීම ආදී කොවිඩ් වැළැක්වීම සම්බන්ධයෙන් මූලික උපදෙස් ද ඇතුළුව ක්‍රීඩාපිටිවලට ඇතුළුවීම ක්‍රීඩකයින් කාර්ය මණ්ඩල හා නරඹන්නන්, විනෝදාස්වාදය සපයන්නන්/ දිරිගන්වන්නන් සඳහා ප්‍රමාණවත් සෞඛ්‍යාරක්ෂණ පිළිවෙත් පවත්වාගෙන යාමටත්, ක්‍රීඩා පරිශ්‍රයන් තුළ ආහාර අලෙවිය, හා අලෙවිකරණ කාර්ය මණ්ඩලවල සෞඛ්‍යාරක්ෂණ පිළිවෙත් නිසි පරිදි පවත්වාගෙන යාම ඇතුළු ක්ෂේත්‍ර රැසක් සම්බන්ධයෙන් බලපැවැත්වෙන පරිදි ලබා දී ඇති විශේෂ උපදෙස් හා මඟපෙන්වීම් මෙම උපදෙස් මාලාවෙහි ඇතුළත් ය.