එක්සත් ජනතා නිදහස් සන්ධානයේ ජාතික ලැයිස්තුවට අයත් ජනතා නියෝජිතයින් නම් කර ඇති බව වාර්තාවෙයි. ඒ අනුව අගමැති රත්නසිරි වික්‍රමනායක මහතා ඇතුළු අමාත්‍යවරු කිහිප දෙනෙක්ද, පූජ්‍ය එල්ලාවල මේධානන්ද හිමියන්ද, පූජ්‍ය ඕමල්පේ සෝභිත හිමියන්ද, ප්‍රවීණ නිළි මාලනී ෆොන්සේකා, කතානායක වි.ජ.මු. ලොකුබණ්ඩාර, මහාචාර්ය රජීව විජේසිංහ මෙලෙස ජාතික ලැයිස්තුවට ඇතුලත් කොට ඇති බව වාර්තා වෙයි. එ.ජ.නි.ස. මහලේකම් අමාත්‍ය සුසිල් ප්‍රේමජයන්ත් විසින් මැතිවරණ කොමසාරිස් වෙත භාරදෙනු ලැබීය.

පාර්ලිමේන්තුව සඳහා ජනතා නියෝජිතයන් 196ක් සහ ජාතික ලැයිතුවෙන් මන්ත්‍රීවරුන් 29ක් තෝරා පත් කර ගැනීම සඳහා මෙම මැතිවරණය පැවැත් වේ.

ටී.එම්.වී.පී. නායක ශිවනේෂතුරෙයි චන්ද්‍රකාන්තන් විසින් උතුරු පළාත සඳහා නාමයෝජනා භාරදීම අද පෙරවරුවේ සිදුවිය. එහිදී අදහස් දැක්වූ ඔහු ප්‍රකාශ කර සිටි‍න්නේ මැතිවරණය සඳහා තමන් ප්‍රථම වතාවට ඉදිරිපත්වන බවත් තම බලාපොරොත්තුව වන්නේ උතුරේ ජනතාවට සේවය කිරීම බවත්ය.

මේ අතර දකුණු පළාත් සභාවේ ගාල්ල දිස්ත්‍රික්කය සඳහා අමාත්‍ය පියසේන ගමගේ මහතාගේ ප්‍රධානත්වයෙන් නාමයෝජනා භාරදීමද අද පෙරවරුවේදී සිදුවිය. ගාල්ල දිස්ත්‍රික් කණ්ඩායම සදහා දිවයිනේ ජනප්‍රියතම පුද්ගලයින් කිහිපදෙනෙකු ඇතුලත්ය. බද්දේගම සමිත හිමි, ප්‍රවීණ රංගන ශිල්පිණී ගීතා කුමාරසිංහ මහත්මිය, ආන්දෝලනාත්මක චරිතයක් වූ නිශාන්ත මුතුහෙට්ටි මහතාද ඒ අතර වෙයි. තම කණ්ඩායමට ශක්තිමත් පිරිසක් සිටින බවත් ගාල්ල දිස්ත්‍රික්කයෙන් වැඩිම පිරිසක් පාර්ලිමේන්තුවට යැවීමට හැකිවනු ඇති බවටත් බලාපොරොත්තු වන බව පියසේන ගමගේ මහතා පවසයි.

ජනරාල් සරත් ෆොන්සේකා මහතාගේ නායකත්වයෙන් යුතු නව විකල්ප පෙරමුණක් යටතේ ඉදිරි මහ මැතිවරණයට ඉදිරිපත්වීමට තම පක්ෂය තීරණය ඇතැයි ජනතා විමුක්ති පෙරමුණේ ප්‍රධාන ලේකම් ටිල්වින් සිල්වා මහතා කොළඹදී ඊයේ පැවති ප්‍රවෘත්ති සාකච්ඡාවේදී පැවසීය.

ජෙනරාල් සරත් ෆොන්සේකා මහතා ජනාධිපතිවරණයට තරග කල හංසයා ලකුණ යටතේ එක්සත් ජාතික පක්ෂය සමග පුළුල් පෙරමුණක් වශයෙන් මහ මැතිවරණයට ඉදිරිපත්වීම පිළිබදව එක්සත් ජාතික පක්ෂය සමග සාකච්ඡා පැවතියද ඒ අතරතුරේදී එම පක්ෂය අලියා ලකු‍ණින් තරග කිරිමට ගත් තීරණය ඊට බාධකයක් වූ බැවින් මෙවැනි පියවරකට යාමට සිදු වූ බවද ටිල්වින් සිල්වා මහතා පැවසීය.