වව්නියාව නගරයේ ව්‍යාපාරිකයන් නගරයේ සියලු කඩ සාප්පු වසා දමා විරෝධතාවයක නිරත වන බව වාර්තා වේ. මෙම විරෝධතාවයට හේතු වී ඇත්තේ වව්නියාව නගරයේ ව්‍යාපාරිකයෙක් පැහැරගෙන ගොස් කප්පම් ඉල්ලීමේ සිද්ධියක් මුල්කරගෙනයි. තවද තම ව්‍යාපාරිකයන්හට නිදහසේ වෙළෙඳාමක් කරගෙන යාමට නොහැකි තරමට වව්නියාවේ කනගාටුදායක තත්ත්වයක් නිර්මාණය වී ඇති බවද වාර්තා වේ.

සිරිකොත ඉදිරිපිටදී ගිනි තබා ගත් පුද්ගලයා අද උදෑසන ජීවිතක්ෂයට පත්ව ඇති බව වාර්තා වේ. මෙම පුද්ගලයා ඊයේ පස්වරුවේ එක්සත් ජාතික පක්ෂ‍යේ මූලස්ථානය (සිරිකොත) ඉදිරිපිටදී මොහු සිය සිරුරට ගිනි තබා ගෙන ඇති අත‍ර කළු‍බෝවිල රෝහලට ඇතුළත් කිරීමෙන් අනතුරුව වැඩිදුර ප්‍රතිකාර සඳහා කොළඹ ජාතික රෝහලට ඇතුළත් කර ඇත.

හෙට දියත් කිරීමට නියමිතව තිබූ පෞද්ගලික බස් රථ හිමියන්ගේ වැඩ වර්ජනය අත්හිටුවීමට තීරණය කර ඇත. එයට හේතු වී ඇත්තේ පෞද්ගලික බස් හිමියන්ගේ සියළු ගැටළු සම්බන්ධයෙන් බස්නාහිර පළාත් ප්‍රවාහන අමාත්‍යාංශ නිලධාරීන් සමඟ පැවති සාකච්ඡාව සාර්ථක වූ බව පෞද්ගලික බස් රථ හිමියන්ගේ සංගමයේ සභාපති ගැමුණු විජේරත්න මහතා සදහන් කළේය. වැඩිදුරටත් අදහස් දක්වමින් ඒ මහතා ප්‍රකාශකර සිටියේ අවම බස් ගාස්තුව වන රුපියල් 6 ක මුදල රුපියල් 7 දක්වා‍ සංශෝධනය නොකරන බවයි.

වියට්නාම් තානාපති කාර්යාලයක් මෙරට ස්ථාපිත කිරීම සඳහා වියට්නාමය හා ශ්‍රී ලංකාව අතර එකඟත්වය පල වී තිබේ.

අග්නිදිග ආසියානු රටවල නියෝජිතයන්ගේ සැසිවරය මේ දිනවල වියට්නාමයේ හැනොයි නගරයේදී පැවැත් වෙන අතර ඊට සමගාමීව දෙරට නියෝජ්‍ය විදේශ අමාත්‍යවරු හමු වූ අවස්ථාවේදී මේ පිළිබඳ එකඟතාවයකට පැමිණියහ.
විදේශ නියෝජ්‍ය අමාත්‍ය ගීතාංජන ගුණවර්ධන මහතා ඇතුළු ශ්‍රී ලාංකීය දූත පිරිසක් මේ දිනවල වියට්නාමයේ නිල සංචාරයක නිරත වන අතර එහිදී වියට්නාමය ශ්‍රී ලංකාවේ බිම් බෝම්බ ඉවත් කිරීමේ ක්‍රියාවලියට ලබාදෙන සහාය පිළිබඳ ඇගයීමට ද ලක්විය.

අග්නිදිග ආසියානු රටවල තවදුරටත් ක්‍රියාත්මක වන එල්ටීටීඊ ක්‍රියාකාරකම් පාලනය කිරීම සඳහා වියට්නාම් බුද්ධි සේවාවල සහාය ලබාගැනීම සම්බන්ධයෙන් ද මෙහිදී අවධානයට ලක් විය.

ඉබ්බන්කොටුව ප්‍රදේශයේ කලක සිට සිදුකරගෙන යනු ලැබූ ඉන්ධන ජාවාරමක් පිළිබද තොරතුරු අනාවරණය කරගැනීමට දඹුල්ල පොලිසිය සමත් වී ඇත. ත්‍රිකුණාමලයේ ප්‍රධාන ඉන්ධන ගබඩාවල සිට පිරවුම්හල් වෙත ඉන්ධන රැගෙන යන බවුසර් ඉබ්බන්කොටුව ප්‍රදේශයේ අතරමග නවතා ඒවායේ මුද්‍රා තැබීම් ඉවත් කොට ඉන්ධන ලබාගැනීම සිදුකොට ඇතැයි වාර්තා වේ. මේ සම්බන්ධයෙන් ඉන්ධන බවුසරයක රියදුරෙකු, රියසහායකයා සහ ඉන්ධන මිලදී ගැනීමට පැමිණි පුද්ගලයින් කිහිපදෙනෙකු පොලිසිය විසින් අත්අඩංගුවට ගෙන ඇත.

රුහුණු සරසවියේ ශිෂ්‍යයාගේ මරණය සම්බන්ධයෙන් පූර්ණ කඩිනම් පරීක්ෂණ වාර්තාවක් ලබා දෙන ලෙස ජනාධිපතිවරයා අදාළ බලධාරීන්ට නියෝග කර තිබේ.

තවද ජනාධිපති මාධ්‍ය අංශය සදහන් කරනුයේ මෙහි ඇති වූ සමස්ථ සිද්ධිය පිළිබඳවද කඩිනම් වාර්තාවක් ලබා දෙන ලෙස පොලිස්පතිවරයාට , උසස් අධ්‍යාපන අමාත්‍යාංශයට , විශ්ව විද්‍යල ප්‍රතිපාදන කොමිසමට සහ රුහුණු සරසවි බලධාරීන්ට ජනාධිපතිවරයා දැනුම් දී ඇති බවයි.